Ciucciarella

Mi chjamu Ciucciarella, sò una misgia ma dinò una Signora.

V’aghju da spiegà a mo vita da ch’o sò nata in carrughju di Toga.

Sò lochi di standing ancu pà i felini.

Eiu campava tranquilla incù i mo fratelli, à corre apressu à e bucertule, à circà i topi è à ghjocà da a mane à a sera.

Un ghjornu una manu s’hè lampata nant’à me è mi s’hà rubatu per portammi in un appartamentu.

Figuratevi cum’era cuntenta di perde d’un colpu a mo libertà, a mo famiglia è i mo animali preferiti, quelle bucertule è topi savuriti !

Quessa, issa manu ladra era a manu di mamma, a donna incù quale avia da vive una passione !

Ié, finalamente, stu ladruginu fù l’iniziu d’una bella storia tra mè è dui umani.

Avà, i ghjatti sò diventati i mo nimichi.

Ma tandu, a prima sera, mi sò intanata in qualchi tafone, da u spaventu ch’avia di sti dui grandi animali chi mi ghjustravanu per forse fammi male ?

Finalamente aghju lasciatu u mo locu nascostu per finì in u lettu callu callu di mamma.

Da issu ghjornu, più nimu ùn m’hà mai più scacciafugjatu in casa nostra, sò diventata a figliola cara, quella chì porta l’amore è a dolcezza.

Mamma quand’ella parla di me, pare un libru !

Dice chì sò a più bella di e misgiucce, ch’ellu li piace à allisciami cume sò  fussi un pilù.

U mo sguardu misteriosu l’incanta, quand’ella mi feghja ùn ci hè bisognu di parulle, i nostri ochji mandanu da una a l’altra un missaghju affettuosu.

Ci n’hè un altru chì mi tene caru, babbu.

Ellu paisanu passiunatu di cani, à i ghjatti ùn li fecia male ma ùn li portava mancu interessu.

Da ch’ellu m’hà vistu, tenutu in collu per dammi u biberon, st’omu ch’ùn avia mai avutu figlioli hè diventatu un più bravu di i papà.

Pensu chì babbu è mamma ùn mi vedenu più cume un animale ma cume una persona ùn pocu sferente d’elli, figliola adottiva listessu.

Dopu quattr’anni di tranquillità in Toga, mamma hà pensatu chì forse a mo vita seria più naturale in paese.

Babbu ùn disse micca di nò è eccumi in una gabbia di ferru, striscinata in una mascina scunusciuta chì mi cappia in un terrenu accantu à una casa.

U mo scontru incù l’altri ghjatti, mi n’arricorderaghju fin’ ch’o campu.

Un gattacciu pilutu è antipaticu mi s’hè stirpatu da fammi strappà u core da a paura.

Succorsa da i mo parenti, à mi sò francata ma da stu ghjornu u mo peghju nimicu fù ellu.

Duie misge m’anu fattu festa, volendu carezzammi ma eiu ùn vulia più (sapè) nunda di i gatti, ùn li pudia più vede.

Un annu hè passatu oramai, u misgiacciu u persegue  eiu avà.

Sò a sola à podè entre in casa è chjinammi nant’à u canapè.

L’altri cercanu à fà cume mè,ma què ùn l’hè permessu.

Sole e signore ponu piglià i so asgi è dorme nant’à e ghjinochje di babbu.

Una di e misge s’avvicina à dui metri è à lasciu fà, vistu ch’ella ùn mi vole male.

In paese mi ci piacu, tuttu ghjè passionante.

L’odori di e piante, u salvaticu di i cignali , e piume di l’ucelli, i grilli, st’animali rimpienzanu i falzi ch’avia in Toga per ghjocà…

Sò in paradisu, hè vera !

Ringraziu u signore di i ghjatti è a mo mammuccia d’avè avutu u curragiu di fammi cambià casa.

U mo papà ellu stà u più pussibile incù mè è mi guasta quant’ellu pò incù bone cose à manghjà.

Per ringraziallu li portu aspessu un bellu topu grassu è tondu è u li lampu à i pedi.

Mamma avà s’hè messa in capu di ritornà in scola ma papa è eiu in paese ci campemu.

Ma zittu, ch’ella ùn sia ghjilosa !

Cathy Campana – 15 novembre 2018

chat qui rit 2.jpg

Laisser un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.